Erməni deputatın aldığı "Mercedes-Benz G" modelinin 88 milyon dram, "Bentley Bentayga"-nın isə 186 min avro dəyəri var.

“Haykakan Jamanak”ın verdiyi xəbərə görə, bu haqda Ermənistanın yüksək vəzifəli rəsmilərinin etik komissiyası Qaqik Tsarukyanın 2016-cı il üzrə bəyannaməsinə əsasən məlumat yayıb. Bu avtomobillərdən başqa, Qaqik Tsarukyan ötən il 118 min avroya mebel, 251 min avroluq pərdə alıb.

O, 2016-cı ildə Ermənistan parlamentinin deputatı olduğu zaman 2.5 milyard dram gəlir əldə edib ki, bunun 4.4 milyon dramını maaşı təşkil edib. Qalan gəlirlər dividendlər, icarə haqları və digər mənbələrdən toplanıb.

Tsarukyuanın həyat yoldaşı Cavahir Tsarukyanın da kifayət qədər mülkü var. 2016-cı ildə 30 min ABŞ dollarına sırğa alan Cavahir, həmçinin 5 min dram miqdarında səhmlərə malikdir. Tsarukyanın həyat yoldaşının gəlirləri 18 milyon dram (icarə qarşılığında alınan haqlar), 121 min avro (digər gəlirlər) və 300 min ABŞ dolları (dividendlər) təşkil edib.

Şahin Qocayev
AzVision.az